同學完成課程至少一年後的分享

2023/7      完成英國靈魂數字學文憑 (Part 1) 課程

2021-2023  每周家庭排列工作坊

2022/4       完成英國靈魂塔羅啟蒙之旅 

2021/9-11   Energy Healing 工作坊

2021/4        完成英國靈魂塔羅啟蒙之旅 

2020/10     完成英國靈魂數字學基礎課程 

2020/7       完成英國靈魂數字學基礎課程 

2020/5       完成英國靈魂塔羅啟蒙之旅 

一致合一

不經不覺學習更有意識地行人生道路，已經一段時間。由開始完全不覺知甚麼是愛，不能了解及表達自己的感受。到開始更能分辨什麼是自己的、別人的，能夠覺察那個聲音是頭腦的不願意，那個聲音是內心最真實當下的感覺，從而自然地給自己安全感，放低自己給自己的約束框架，面對不會知道的未來，讓一切的可能性發生。

無論一直在Star School或在合氣道的學習，由情緒或身體，看家庭或自己，數字或畫畫，內功外功，很多很多所有不同的系統都是令人更身、心、靈一致的方法。最合適自己的方法永遠都會「飛過來」，都是安排，而自己願不願意去從心跟隨是自己的選擇。無論願不願意，靈魂永遠都會不停有方向去叫醒自己，令到自己看見和學習到未一致的地方，成為更真實的自己。

當自己只是用個有限的腦，原來沒有接受到擁有一切的生命。過去的無知令自己以為頭腦分析的選擇是最安全，覺得個心經常玩我、給我折磨，「推我去死」，例如為什麼會成為上靈魂數字。其實都是我自己頭腦的單一想法，是一個誤解，我只不過是一個有手有腳的軀殼。「我」就好像一個水壺，生命才是水。能夠放低自我，不去扮水，做回一個願意裝水的水壺才是最安全最舒服，簡單實在，就好像裝滿水的水壺一樣。個水壺有一切可能性，靈魂一直都知道要如何運用，自己只需要聽和跟隨內心的指示去享受裝水和倒水。

然後發現，原來來有機會上靈魂數字文憑課程，內心是多麼興奮（大笑中）。最真實的自己是很會享受任何有緣來到令自己更合一的機會，和身體一致，和靈魂一致，和生命合一。

感恩。

2022/4       完成英國靈魂塔羅啟蒙之旅 

2021/9-11   Energy Healing 工作坊

2021            家庭排列工作坊

2020/10     完成英國靈魂數字學基礎課程 

話說，我要寫分享，仲要又係長嘅，都係嗰句，有興趣睇就是緣份，睇完有得著的也是緣份。

有睇到我面書嘅朋友都知道我近年開始做左"小神婆"， 睇數字，抽牌，energy healing等等。點解無啦啦會學呢啲，我唔知道我有冇分享過但收到通知要再分享下。

不過我一向都對哲學，心理學，科學，唔科學得嚟又有啲科學嘅嘢好有興趣，緣份之下就走上呢條路。

對數字有興趣係真嘅，人生所有嘢都關數學幾何事，係一個工具俾提示人類去理解呢個宇宙。

開初我完全唔知靈魂數字係乜，覺得係睇相之類，只係方法唔同。上堂抄唔徹俾人話做乜乜都要抄，問問題又話不如問下自己先，好鬼崩潰。但係依家又有notes power pt 寫好晒俾人睇，罷明一直針對我(講笑) 。學嘅嘢好多，數字幾何，哲學，玄學，乜都有，資訊多到不得了。到上塔羅班，我已經放棄再抄，明嘅就明，我嘅靈魂會搞掂，實際上其實我後來都明明地嘅，然後我已經冇乜問題問到出口，因爲同自己講完之後我個心係有答案，"問" 嘅最大原因只係想得到認同。

在我角度無論塔羅/靈魂數字等等都只係一個工具幫助更容易認識自己，感覺自己，感覺周遭能量嘅流動，感覺到別人能量嘅流動。呢啲工具去係幫助接收/傳遞訊息，幫助面對當下，提醒你呢一刻你喺咩狀況，有咩辦法幫到你過渡你覺得有問題嘅關口。當然，有啲人係唔需要呢啲工具，做自己中意嘅事都會有啟發。

靈魂數字之後係上每星期一次嘅meditation/energy healing/家排，講乜多數都係好隨心但又學到嘢。學到嘅其實一直自己都知道，只係視而不見，因爲唔想望，上堂多數就會迫你望同面對平時自己個腦會skip左嘅問題。科學啲講似心理學，所以神奇得嚟其實好科學，哈。

Energy healing 老師話同大家比較有聽過嘅靈氣學相似。但我學嘅完全冇任何特別嘅手勢/符號/口決，一齊會做嘅動作同講嘅嘢都係隨心。自己覺得同氣功/太極呢啲有啲似，呢個係我都幾有興趣嘅"項目" 。神奇在感受到自己身體狀況，有時唔舒服感受下就會自己feel good返，亦到可以感受到人地邊度唔舒服(前題係被感受嘅人真心願意俾你感受) 。亦都學識分辨邊啲係 屬於自己嘅能量，有咩影響緊自己。

學呢啲嘢嘅兩三年間，發生好多事。社會事件，生離死別，病毒感染等等。老實講如果冇學呢啲，我都唔知點樣去過渡。科學啲講你當我學識認識自己，愛自己同自我開解吧。

上天安排好神奇。溜冰係我最全心全意做到自己嘅活動，亦令我好大改變。學溜冰當中感恩遇到各種不同嘅人，好嘅壞嘅，豐富左我嘅生命歷程，幫助我學習&成長。

以前我都幾經常迷失，唔知道自己嘅位置喺邊，我應該做啲咩，點解我唔夠人偉大唔夠人叻唔夠人咁出名。依家我明白我嘅位置，我做自己已經足夠，唔需要同人比較。需要的時候就會出現嘅嘢。

花若盛開，蝴蝶自來。

人若精彩，天自安排。

生命影響生命。

欣賞自己，愛自己。